2023 онд иргэдэд үзүүлсэн консулын үйлчилгээний мэдээлэл
2023-01-06
ЭСЯ-наас Чех, Словак улсуудад ажиллаж амьдарч буй иргэдтэйгээ ойр ажиллаж тэдний санал бодлыг сонсох, иргэд, хуулийн этгээдийн хууль ёсны эрх ашгийг хамгаалах, иргэдэд үзүүлж буй төрийн үйлчилгээний чанар, хүртээмж, мэдээллийг нэмэгдүүлэхэд анхаарч ажиллалаа. 2023 оны 11 дүгээр сарын 30-ны өдрийн байдлаар Чех улсад манай улсын 12,589 иргэн албан ёсны зөвшөөрөлтэй ажиллаж, сурч, амьдарч байгаа бөгөөд 6,100 нь эрэгтэй, 6,489 нь эмэгтэй. Тэдний 6,332 нь байнга оршин суух зөвшөөрөлтэй, 6,257 нь түр оршин суух зөвшөөрөлтэй байна. Словакт манай 100 гаруй иргэн оршин суудаг.
- Гадаад харилцааны сайд Б.Батцэцэг айлчлалынхаа үеэр Чех улсад ажиллаж, амьдарч буй иргэдийн төлөөлөлтэй уулзаж, мэдээлэл хийж, санал сэтгэгдлийг сонсов. Элчин сайд Братислав, Пардубицэ, Ческа Липа, Страж под Ралскем зэрэг хот, монголчуудын ажилладаг үйлдвэрийн газартай танилцаж, хотын удирдлага, иргэдтэй уулзалт хийв. 3 удаагийн явуулын консулын үйлчилгээг иргэдэд үзүүлэв.
- Иргэдэд шаардлагатай мэдээ, мэдээллийг ЭСЯ-ны фэйсбүүк хуудсаар тогтмол хүргүүлсэн бөгөөд зөвлөмж, сэрэмжлүүлэг, анхааруулга 50 гаруйг хүргэв.
- Нийгмийн хамгааллын тухай Монгол Улс болон Бүгд Найрамдах Чех Улс хоорондын хэлэлцээр хэрэгжиж эхлэв. Манай улсын 50 гаруй иргэд тэтгэвэр тогтоолгох хүсэлтээ гаргасан байна.
- Төрийн үйлчилгээг иргэдэд ойртуулах цахимжуулах хүрээнд цахим нотариатын болон “E-Mongolia” системээс лавлагаа, мэдээлэх авах “Хурдан” системийг үйл ажиллагаандаа нэвтрүүлж, ашиглаж эхлэв.
- Давхардсан тоогоор 5 мянга гаруй иргэнд консулын үйлчилгээ үзүүлэв. Тухайлбал, энэ онд 230 шахам хүүхэд мэндэлж, 70 шахам хос гэрлэлтээ бүртгүүлж гэрчилгээ авав. Улмаар нотариат, бичиг баримтын захиалга авах, баталгаажуулах зэрэг үйлчилгээг 5,000 шахам иргэнд үзүүлсэн байна. Тайлант хугацаанд 14,000 шахам иргэнд утсаар, биечлэн болон цахимаар зөвлөгөө, мэдээлэл өгч, иргэдээс гаргасан 500 гаруй өргөдлийг шийдвэрлэв.
- Иргэдийн үүсгэл санаачилгаар байгуулагдсан холбоо, ТББ-уудтай хамтран уламжлалт "Хаврын баяр" спортын тэмцээн, Европ дахь Mонголчуудын ахмад сагсан бөмбөгчдийн аварга шалгаруулах тэмцээн, Европ дахь Mонголчуудын волейболын аварга шалгаруулах тэмцээнийг тус тус зохион байгуулахад санхүүгийн болоод зохион байгуулалтын дэмжлэг үзүүлэв. Мөн "Ширмэл зодогтон" үндэсний бөхийн холбоо байгуулахад дэмжлэг үзүүлэв.
- Иргэд, хамт олны хүсэлтээр ЭСЯ-наас зөв амьдралын хэв маяг, сэтгэцийн эрүүл мэндийн талаар зөвлөгөө өгөх цуврал сургалт эхлүүлж, эхний сургалтыг “Хос багана” ТББ болон Пардубицэ хотын Гадаадын иргэдийн интеграцчлалын төвтэй хамтран 12 дугаар сарын 2-нд зохион байгуулав.
- Чех улсад оршин суугаа манай иргэд жолооны үнэмлэхээ Чех улсын жолооны үнэмлэхээр солих боломжийг сэргээхээр ажиллаж байна.
- Чехийн тал манай улсаас авах гэрээт ажилтны квотыг 1000-аас 3000 болгон нэмэгдүүлэв. Чехийн тал хөдөлмөрийн гэрээгээр ирэх иргэдийн визийн мэдүүлгийг хүлээн авах төв болон "Pre-departure training" буюу виз мэдүүлсэн иргэдэд сургалт, зөвлөгөө өгөх төв байгуулах зорилгоор тендер зарлаж, шалгаруулж байна.
- ЭСЯ-наас Чех, Словакт суугаа Олон улсын шилжилт хөдөлгөөний байгууллагын салбаруудтай хамтран ажиллаж, зарим иргэнийг хүсэлтийнх нь дагуу эх орондоо буцахад нь туслах, үнэ төлбөргүй зөвлөгөө өгөх зэрэгт тус байгууллагын дэмжлэгийг авав. Словак дахь ОУШХБ-аас манай иргэдэд Словакийн хууль, эрх зүйн чиглэлээр мэдээлэл өгөх, мөн словак хэлний сургалт зохион байгуулахад дэмжлэг үзүүлсэн.