“МОНГОЛ ТҮҮХЭН ГЭРЭЛ ЗУРАГТ” ЭРДЭМ ШИНЖИЛГЭЭНИЙ БАГА ХУРАЛ БОЛЛОО
Үйл явдлын мэдээ
2024-04-26
Элчин сайд Д.Гансүх хурлын нээлтэд оролцож хэлсэн үгэндээ зохион байгуулагчдад талархал илэрхийлж, Монгол Улсын төр, засгаас хилийн чанад дахь монгол судлалыг хөгжүүлж, дэмжлэг үзүүлэхэд онцгойлон анхаарч байгааг тэмдэглэв. Улмаар энэ удаагийн эрдэм шинжилгээний хурал нь Монголын түүх, соёл, хотжилт, шинжлэх ухаан, шашин, уламжлалын чиглэлээрх түүхэн, ховор, нандин гэрэл зургуудыг танилцуулж Монголын түүх, соёлын өв сангаа өргөн хүрээнд судалж ирсэн гадаад орны эрдэмтдийн бүтээлүүдийг улам баяжуулах ач холбогдолтойг дурдлаа.
Бага хуралд Монгол, Чех, Унгар, Их Британи, Япон, Оросын эрдэмтэн, судлаачид оролцож, Монгол орноор явсан аялагч, жуулчин, ажиллаж, амьдарч байсан гадаадын иргэдийн авсан олон тооны түүхэн гэрэл зургуудын талаар илтгэл тавьж, цаашид монголын түүхэн гэрэл зургуудыг харьцуулан судлах, таньж тодруулах, төрөлжүүлэх, хамтарсан төсөл хэрэгжүүлэх, нэгдсэн цахим сан үүсгэх зэрэг асуудлыг хэлэлцэв.
Чех улсын Үндэсний музейн захирал М.Лукеш хурлын нээлт дээр хэлсэн үгэндээ тус музей нь 2025 онд Чингис Хааны тухай үзэсгэлэнг дэлгэн үзүүлэхээр манай улсын Чингис Хаан үндэсний музейтэй хамтран бэлтгэлийг хангаж байгааг дурдсан бол Элчин сайд 2025 онд тохиох Монгол Улс, Чех улсын хооронд дипломат харилцаа тогтоосны 75 жилийн ойн хүрээнд хамтарсан ном, гэрэл зургийн үзэсгэлэн гаргахаар төлөвлөж байгаагаа мэдээлэв.
